राष्ट्रिय स्वतन्त्र पार्टीकी सांसद सोविता गौतमले ‘द वर्ल्ड वान योङ पोलिटिसियन अफ दि एयर अवार्ड’ जितेकी छन् । आफ्नो पदको उपयोगमार्फत समुदाय र युवा पुस्तामा सकारात्मक प्रभाव पार्न सफल १८ देखि ३५ वर्षभित्रका ५ नेतालाई यो अवार्ड दिने गरिएको छ ।
मंसिर २०७९ काे चुनावमा २७ वर्षीया साेविता राष्ट्रिय स्वतन्त्र पार्टीका तर्फबाट काठमाडौं क्षेत्र नम्बर २ मा विजयी भएकी थिइन् । १५ हजार २ सय २९ मत ल्याएर जित हात पारेकी उनले एमालेका मणिराम फुयाल र पूर्वसभामुखसमेत रहेकी माओवादी केन्द्रकी ओनसरी घर्ती मगरलाई पराजित गरिदिएकी थिइन् । उनी प्रतिनिधिसभामा कान्छी सदस्य हुन् । साेवितासँग अधिवक्ता, पत्रकारिता र सामाजिक संघसंस्थामा रहेर काम गरेको अनुभव छ ।
‘द वर्ल्ड वान योङ पोलिटिसियन अफ दि एयर अवार्ड’का लागि सोवितासँगै क्यानाडाकी एरियल कयाबगा, अस्ट्रेलियाकी आयोर मकोर कुट, न्युजिल्याण्डका मोको टेपानिया र बेल्जियमका सेमुएल कोगोलाटी पनि छनौट भएका छन् ।
उनीहरूलाई यसै वर्ष हुने वान योङ वर्ल्ड समिट मा पुरस्कार प्रदान गरिने जनाइएकाे छ ।
