कर्णाली प्रदेश सभा सदस्य तथा पूर्व मुख्यमन्त्री जीवनबहादुर शाहीले कर्णाली प्रदेशमा नुनको अभाव हल्ला मात्र भएको औंल्याएका छन् ।

उनले भने ‘कर्णालीमा नुन नपाएको वा एक पोका नुनको ७० देखि १०० रुपियाँ तिरेको भन्ने कुरा अफवाह हो । कहिलेकाहीँ राज्यले धेरै सुविधा दिनु पनि गलत रहेछ । सुर्खेतमा २० रुपैयाँ पर्ने नुन सरकारले जुम्लामा ९ रुपियाँ दिन्छ । सरकारले सब्सिडी दिएको नुन पाइएन भनेका होलान् । तर बजारमा नुन अभाव छैन ।’

‘प्रमुख प्रतिपक्षले शंकाको भरमा लंका जलाउनु उचित हुँदैन । शंकाकै भरमा सुनकाण्डमा राजनीतिक सलंग्नता छ भन्न मिल्छ ? सरकारले एउटा छानबिन समिति बनाइसकेपछि फेरि अर्को बनाउने कुरा भएन नि । प्रत्येक घटनामा संसदीय छानबिन समिति वा उच्चस्तरीय छानबिन समिति बनाउने ? एमालेले हिजो पनि प्रधानमन्त्रीले राजीनामा नगरेसम्म सदन चल्न दिँदैनौं भनेको सुनेकै हो । जेमा पनि राजीनामा माग्ने अनि उच्चस्तरीय छानबिन समिति माग गर्नु केटाकेटीपन भयो कि ? राज्यसंयन्त्र चलाउने कुरामा यसरी बचकनापन देखाउनु हुँदैन,’ एक कार्यक्रममा बोल्दै उनले भने ।

कांग्रेस नेता समेत रहेका शाहीले पुष्पकमल दाहाल प्रचण्ड नेतृत्वको सरकारले आफ्नो काम गरिरहेको दाबी पनि गरे । उनले भने, ‘सरकारले केही पनि गरेन भन्ने सत्य होइन । तर जति हुनुपर्ने हो, त्यति नभइरहेको भन्न सकिन्छ । सरकारले एक क्विन्टल सुन नसमातेको भए जनतालाई थाहा हुन्थ्यो त ? भ्रष्टाचारको कारबाही अघि नबढाएको भए थाहा हुन्थ्यो ? सत्तापक्ष, प्रमुख प्रतिपक्ष जसले गरे पनि हामीले राम्रो कुरालाई राम्रो नै भन्न सक्नुपर्छ ।’