गैरआवासीय नेपाली संघ एनआरएनएले जाजरकोट र रुकुमपश्चिमका चारसय जना भूकम्प पीडितलाई एक करोडको राहत वितरण गरेको छ । जाजरकोटको भेरी नगरपालिका–१ बाहुनगाउँका दुई सयघरपरिवार र रुकुमपश्चिमको आठवीसकोट नगरपालिकाको दुई सय जना भूकम्प पीडितलाई प्रभावित क्षेत्रमा पुगेर मंगलबार राहत वितरण गरेको हो ।

संघका अध्यक्ष डां बद्री केसीको नेतृत्वमा जाजरकोट रुकुमपश्चिमको प्रभावित क्षेत्रमा पुगेर त्रिपाल, खाद्यान्न, लत्ताकपडालगायतका सामाग्रीसहित दिएको हो । जिल्लाको विपद् व्यवस्थापन समिति र जिल्ला स्थित सक्रिय राजनीतिक दलको सर्वदलीय बैठकले जाजरकोटको बाहुनथान र रुकुममा।राहत वितरण गर्ने निर्णय गरेको थियो ।

विभिन्न बाध्यता र परिस्थितिले गर्दा विदेशमा भएपनि गास कटाएर यो विपदमा सहयोग गरिएको एनआरएनका अध्यक्ष बद्री केसीले बताए । हामी विदेशमा भएपनि नेपाल र नेपालीप्रतिको मायाँ धेरै छ । यहाँ आपत विपद् हुँदा हाम्रो मन रुन्छ, अध्यक्ष केसीले भने, एनआरएनमा आवद्ध साथीहरुले आफ्नो गास कटाएर दिएको रकमले सहयोग गरेका छौं ।’

प्रति घरपरिवार ५० किलोको एक प्याक चामल, पाँच लिटर तेल, पाँच किलो दाल, साढे दुई किलो नुन, चप्पल, न्यानो लूगाकपडासहित ११ प्रकारका सामग्री वितरण गरिएको सचिव मनोज कुमार श्रेष्ठले बताए । प्रभावित क्षेत्रको घरआगनमा गएर प्रत्यक्ष रुपमा सहयोग र त्यहाँको प्रारिस्थितिलाई निहाले र अन्य आवश्यक सहयोगको जोहो गर्ने सोच बनाएको सचिव श्रेष्ठको भनाई छ । त्यहाँका पीडित परिवारलाई निरन्तर सहयोग गर्न खटिनेछौं महासचिव गौरीराज जोशीले भने । हामीले कर्णाली प्रदेश अस्पतालमा रहेका ३१ जना विरामीहरुलाई ५० हजार रुपैयाँ सहयोग गरेका छौं ।

यसैगरी संघले पहिलो चरणमा सरकारको राहत कोषमा १० लाख रुपैयाँ सहयोग गर्ने गरिसकेको छ । प्रभावित क्षेत्रका बासिन्दाको चित्कार विभिन्न सञ्चार माध्यममा देखेकाले आफै सोही स्थानमा पुगेको उपाध्यक्ष रोजिना प्रधानराईले बताइन । एक महिनासम्म पुग्ने खाद्यन्न सहित लत्ता कपडा तत्तकाललाई सहयोग गरेका छौं । अन्य आवश्यक परेको खण्डमा जेजस्तो सहयोग गर्न हामी तयार छौं । उनले भनिन्, प्रभावित क्षेत्रका बासिन्दाको माग अनुसार एनआरएनएले पुरा गर्ने छ । प्रभावित क्षेत्रमा एनकारएनएका उपमहासचिव प्रविण गुरुङ, सहकोषाध्यक्ष अभिमन्यु बस्नेत लगायत २६ जनाको टोली प्रभावित क्षेत्रको पुगेको थियो ।