सुर्खेत । मुगुको मुगमकार्मारोङ गाउँपालिका–२ डोल्फु गाउँमा हतियारसहितको समूह पसेर लुटपाट गरेको छ । शनिबार राति भरुवा बन्दुकसहित ८–९ जनाको समूह गाउँमा पसेर स्थानीयलाई तर्साएर लुटपाट गरेको जिल्ला प्रहरी कार्यालय मुगुले जनाएको छ ।
स्थानीयहरु यार्सागुम्बा टिप्न गएका बेला गाउँमा ८–९ जनाको समूह आएर घरहरुमा लुटपाट गरेको खबर आएपछि आइतबार नै जिल्ला प्रहरी कार्यालयबाट हिडेको प्रहरीको टोली डोल्फु गाउँमा पुगेको जिल्ला प्रहरी कार्यालय मुगुले जनाएको छ ।
घटना भएको डोल्फु गाउँ सदरमुकामदेखि ढाई दिनको पैदल दूरीमा पर्छ। युवाहरु यार्सागुम्बा टिप्न पाटन गएको र घरमा बुढापाका मात्र भएको मौका छोपेर लुटेरा समूह गाउँ पसेको र लुटेरा समूहले घरमा भएका कुकुरहरुलाई गोली हानेर मारिदिएको पनि अपुष्ट खबर आएको प्रहरीले जनाएको छ।
संवाददाता । सोमबार, जेठ १४, २०८१ मा प्रकाशित