काठमाडौँ । नेकपा (माओवादी केन्द्र) का अध्यक्ष पुष्पकमल दाहालले अहिलेको परिवर्तनमाथि प्रश्न उठाउन खोजिएको बताएका छन् ।
सोमवार झापाको कचनकवलमा सुरु भएको जनतासँग माओवादी अभियानको उद्घाटन गर्दै अध्यक्ष दाहालले यस्तो बताएका हुन् । उनले अहिलेको परिवर्तन त्यत्तिकै नआएको बताए । उनले हजारौँ वीर शहीदहरूको रगत र पसिनाबाट अहिलेको परिवर्तन सम्भव भएको बताए । माओवादीले ल्याएको अहिलेको परिवर्तनमाथि प्रश्न उठाउने गरिएको भन्दै आपत्ति जनाए ।
उनले भने ‘अहिलेको परिवर्तन त्यत्तिकै पाइएको होइन । तपाईँ हाम्रा हजारौँ वीर छोराछोरीहरूले रगतको मूल्य तिरेर मात्रै देश संघीय लोकतान्त्रिक गणतन्त्रमा गएको हो । यो संघीय लोकतान्त्रिक गणतन्त्रप्रति दलालहरूले तपाईँ हामी जनतालाई माया गरेर हामीलाई दिएको परिवर्तन होइन । तपाईँ हामीले रगत बगाएर त्याग, तपस्या गरेर वीरतार बलिदानका धेरै कीर्तिमानहरू कहिल्यै नमेटिने गरी तयार पारिएका बलमा मात्रै यो परिवर्तन सम्भव भएको हो । अहिले यो परिवर्तनमाथि प्रश्न उठाउन खोजिएको छ । अहिलेको संविधानमा एकथरी मान्छेहरूले त्यसको प्रस्तावनादेखि अन्त्यसम्म माओवादीको छाप देख्छन् ।’
अध्यक्ष दाहालले एकथरीले प्राप्त उपलब्धि खोस्न संविधानमाथि आक्रमण गर्ने गरेको बताए ।
संवाददाता । सोमबार, फागुन १२, २०८१ मा प्रकाशित