काठमाडौँ । राष्ट्रपति रामचन्द्र पौडेल र प्रधानमन्त्री केपी शर्मा ओलीबीच भेटवार्ता भएको छ ।
राष्ट्रपति पौडेल र प्रधानमन्त्री ओलीबीच राष्ट्रपति कार्यालय शीतल निवासमा आज साँझ भेट भएको हो । उनीहरूबीच मुलुकको पछिल्लो समसामयिक विषयमा छलफल भएको राष्ट्रपतिको स्वकीय सचिवालयले जनाएको छ।
‘राष्ट्रपति र प्रधानमन्त्रीबीच विभिन्न विषयमा भेट भइरहन्छ । सरकारका कामकारबाही र अन्य विषयमा पनि उहाँहरूबीच भेट हुन्छ’, राष्ट्रपतिको स्वकीय सचिवालयका एक सदस्यले भने, ‘आजको भेट पनि यस्तै नियमित भेटघाट हो । समसामयिक विषयमा उहाँहरूबीच कुराकानी भयो ।’
देशमा पछिल्लो समय राजतन्त्रको माग गर्दै प्रदर्शन र आन्दोलन भइरहेका छन् । आइतबार पूर्वाराजा ज्ञानेन्द्र शाह पोखराबाट काठमाडौं फर्किने कार्यक्रम छ । उनको स्वागतका लागि राप्रपाले यसअघि काठमाडौंमा तय गरेको जनसभा स्थगित गरेर विमानस्थल पुग्न नेतारकार्यकर्ता लगायतलाई अपिल गरेको छ ।
ज्ञानेन्द्र पोखराबाट काठमाडौं फर्किने अघिल्लो दिन प्रधानमन्त्री र राष्ट्रपतिबीच भएको भेटवार्तालाई अर्थपूर्ण रूपमा हेरिएको छ ।
संवाददाता । शनिबार, फागुन २४, २०८१ मा प्रकाशित