सुर्खेत । सुर्खेत प्रहरीले पाँच किलोभन्दा बढी अवैध लागूऔषध अफिमसहित एक जनालाई पक्राउ गरेको छ। प्रहरीले बुधबार भेरीगंगा नगरपालिका–१० स्थित छिन्चुबाट जाजरकोटको जुनिचाँदे गाउँपालिका–१० का ४६ वर्षीय जयबहादुर बस्नेतलाई पाँच किलो ४५० ग्राम अफिमसहित नियन्त्रणमा लिएको हो।

जिल्ला प्रहरी कार्यालय सुर्खेतका प्रमुख प्रहरी उपरीक्षक (एसपी) सुधिरराज शाहीका अनुसार, अफिमको कारोबार भइरहेको गोप्य सूचनाका आधारमा सुराकी र निगरानी बढाइएको थियो। अनुसन्धानकै क्रममा प्रहरीले ठूलो परिमाणमा अफिम बरामद गर्न सफल भएको हो।

एसपी शाहीले भने, “पक्राउ परेका व्यक्तिले प्रारम्भिक बयानमा अफिम आफैँ उत्पादन गरी बिक्रीवितरण गर्ने गरेको स्वीकारेका छन्।”

अनुसन्धानका क्रममा बरामद अफिमको नेपाली बजारमा प्रारम्भिक मूल्य ८ लाख ८६ हजार ४ सय रुपैयाँ हुने अनुमान गरिएको छ। तर पक्राउ परेका बस्नेतका अनुसार सो परिमाणको अफिम भारतसम्म पुर्‍याउन सकेमा यसको मूल्य ५ करोड रुपैयाँसम्म पुग्ने बताइएको छ।