सुर्खेत । सुर्खेतमा अटो चालकहरुको लापरबाहीका कारण सवारी दुर्घटना र नियम उल्लङ्घनका घटनाहरु पछिल्लो समय बढ्दै गएका छन् । कर्णाली प्रदेशको राजधानी भएसँगै वीरेन्द्रनगरमा सवारी चाप बढ्दै जाँदा दुर्घटनाको संख्या पनि बढेको ट्राफिक प्रहरीले जनाएको छ ।

ट्राफिक प्रहरी कार्यालय सुर्खेतको आर्थिक वर्ष २०८१/०८२ को तथ्यांक अनुसार, जिल्लामा मात्रै अटो दुर्घटनाको संख्या ७४ पुगेको छ । उक्त अवधिमा अटोसम्बन्धी विभिन्न कानूनी उल्लङ्घनका कारण २ हजार २५ चालकलाई कारबाही गरिएको छ, जसबाट १९ लाख २४ हजार ५ सय रुपैयाँ राजस्व संकलन भएको छ ।

आर्थिक बर्ष २०८१/०८२ मा सवारी अनुमतिपत्र प्राप्त नगरी अटो चलाउने ४ सय ८८ चालकलाई कारबाही गरी ९ लाख ७६ हजार रुपैयाँ राजस्व संकलन गरिएको छ । मापसे गरी अटो चलाउने १ सय ३ चालकलाई समेत कारबाही गरी ५८ हजार रुपैयाँ राजश्व संकलन गरिएको ट्राफिक प्रहरीले जनाएको छ ।

जिल्ला ट्राफिक प्रहरी कार्यालय सुर्खेतका अनुसार, नियम उल्लङ्घन र चालकको लापरबाहीले दुर्घटनाको जोखिम बढाएको छ । “यातायात नियमको पालना नगरे दुर्घटनाबाट ज्यानमात्र होइन, ठूलो आर्थिक क्षति पनि हुन्छ,” जिल्ला प्रहरी कार्यालयका प्रमुख प्रहरी निरिक्षक वकिल सुनारले बताए ।

स्थानीय बासिन्दाले पनि अटो चालकहरुको तीब्र गति, ओभरलोड र मदिरा सेवनपछि सवारी चलाउने बानीले दुर्घटनाको खतरा बढाएको गुनासो गरेका छन् । ट्राफिक प्रहरीले चालकलाई गति सीमा ननाघ्न, सवारी अनुमतिपत्र अनिवार्य राख्न र मापसे नगरी मात्र सवारी चलाउन आग्रह गरेको छ ।

• सम्बन्धित समाचार
• सुर्खेतमा ट्राफिक नियम उल्लंघन गर्ने ८२ अटोमाथि कारबाही, एकैदिन ८० हजार राजस्व संकलन
• सुर्खेतमा ट्राफिकद्वारा १ करोड ४५ लाख राजस्व संकलन