नेपाली पूर्वकार्यवाहक सभापति पूर्णबहादुर खड्काले पार्टीभित्र विकसित पछिल्लो घटनाक्रमप्रति कडा असन्तुष्टि जनाउँदै गम्भीर चिन्ता व्यक्त गरेका छन् ।
पार्टीमा एकता कायम गर्न विगत दुई महिनादेखि आफूले इमानदार प्रयत्न गरे पनि त्यसमा कुनै प्रगति हुन नसकेको खड्काको दाबी छ । उपसभापति खड्काले १५औँ महाधिवेशनका लागि नवीकरण गरिएका र नयाँ क्रियाशील सदस्यहरूको नामावली अद्यावधिक गर्ने नाममा देशैभरिबाट दबाब दिने काम भइरहेको भन्दै त्यसलाई ‘घातक’ प्रवृत्तिको संज्ञा दिएका छन् ।
पार्टीभित्र पछिल्लो समय नेताहरूको क्रियाशील सदस्यता केन्द्रले नै स्वतः अद्यावधिक गरिदिन्छ भन्ने हल्ला फैलाइएको भन्दै उनले त्यसको खण्डन गरेका छन् । यस्ता कुराहरू पार्टी पङ्क्तिमा भ्रम फैलाउनका लागि मात्रै चलाइएको अफवाह भएको उनको दाबी छ ।
खड्काले कार्यकर्ताहरूलाई आश्वस्त पार्दै भनेका छन्, ‘सबैलाई महाधिवेशनमा स्वतः भाग लिन पाउने व्यवस्थाको सुनिश्चितता गर्नु हाम्रो जिम्मेवारी हो, ढुक्क हुनुहोस् ।’
