अस्ट्रेलियाका स्टार क्रिकेटर डेभिड वार्नरले नेपाल प्रिमियर लिग (एनपीएल)को तेस्रो संस्करण काठमान्डु गोर्खाजबाट खेल्ने भएका छन्।
काठमान्डु गोर्खाजले सामाजिक सञ्जालमार्फत वार्नरलाई टोलीमा अनुबन्ध गरेको जानकारी दिएको हो। वार्नर एनपीएलमा सहभागी हुने अहिलेसम्मकै चर्चित विदेशी खेलाडी बनेका छन्।
यसअघि अस्ट्रेलियाको क्रिकेटिङ संस्था सिम स्ट्राइकले समेत वार्नरले एनपीएल खेल्ने जनाउँदै सामाजिक सञ्जालमा पोस्ट गरेको थियो। उक्त पोस्टमा वार्नरले समेत प्रतिक्रिया जनाउँदै लाइक गरेका थिए।
काठमान्डु गोर्खाजले सामाजिक सञ्जालमा सार्वजनिक गरेको संकेतका आधारमा वार्नर नै टोलीमा आबद्ध हुन लागेको अनुमान गरिएको थियो। अन्ततः गोर्खाजले उनको अनुबन्धन औपचारिक रूपमा सार्वजनिक गरेको हो।
३९ वर्षीय वार्नर अस्ट्रेलियाका सफल क्रिकेटरमध्ये एक हुन्। उनले अस्ट्रेलियाबाट सन् २०१५ र २०२३ को एक दिवसीय विश्वकप, सन् २०२१ को टी-२० विश्वकप तथा सन् २०२३ को विश्व टेस्ट च्याम्पियनसिप जितेका छन्।
वार्नरले अस्ट्रेलियाका लागि तीनवटै फर्म्याटमा शतक बनाएका छन्। उनले ११० टी-२० अन्तर्राष्ट्रिय खेलमा एक शतकसहित ३२ सयभन्दा बढी रन बनाएका छन्।
समग्र टी-२० क्रिकेटमा समेत वार्नरको प्रभावशाली प्रदर्शन छ। उनले ४३९ टी-२० खेलमा १० शतक र ११८ अर्धशतकसहित १४ हजारभन्दा बढी रन बनाएका छन्।
वार्नरले विश्वका विभिन्न चर्चित फ्रेन्चाइज लिगमा समेत खेलिसकेका छन्। उनले भारतको आईपीएल, अस्ट्रेलियाको बीबीएल, पाकिस्तानको पीएसएल, इंग्ल्यान्डको ‘द हन्ड्रेड’, अमेरिकाको मेजर लिग क्रिकेट, बंगलादेशको बीपीएल, क्यारेबियन प्रिमियर लिग तथा भाइटालिटी ब्लास्टमा सहभागिता जनाइसकेका छन्।
वार्नरको आगमनसँगै एनपीएलको तेस्रो संस्करणमा काठमान्डु गोर्खाजप्रति अन्तर्राष्ट्रिय क्रिकेट समर्थकको चासोसमेत बढ्ने अपेक्षा गरिएको छ।
