सुर्खेत । महिनाको पहिलो शनिबार वीरेन्द्रनगरको मुख्य बजार बन्द हुने गर्छ। जसअनुरुप आज जेष्ठ ७ गते सुर्खेत बजार बन्द भएर दिउँसोसम्म शुनसान थियो। घडीमा साँझको ४ बजेपछि वीरेन्द्रनगरको मुख्य चोक, वीरेन्द्रचोकमा एक हुल युवाहरु भेला हुन थाले। भेला भएका युवाहरुले चर्को स्वरमा ‘कानुन माथी को छ बलात्कारी जो छ’, ‘निर्दोषलाई यातना दोषीलाई उन्मुक्ति किन ?’, ‘मेरो स्कर्ट छोटो कि तेरो सोच ?’ जस्ता प्लेकार्डहरु हातमा बोकेर एक हुल युवाको समुह सुर्खेतको वीरेन्द्रनचोकमा जम्मा भयो । हातमा प्लेकार्ड बोकेर एक पछि अर्को युवा थपिँदै गए । विस्तारै ठूलो समूह जम्मा भयो । भिडबाट एक युवती कराइन् ‘बलात्कार मुद्दामा हद म्याद खारेज गर’ । भिडले उनलाई साथ दिदै नारा लगाए, ‘खारेज गर…।
यो प्रदर्शन ८ वर्षअघि जबर्जस्ती करणीमा परेकी युवतीको न्यायको माग गर्दै गरिएको प्रदर्शन हो । ती युवतीले सामाजिक सञ्जालमार्फत सौन्दर्य प्रतियोगिताको सञ्चालकबाट बलात्कार भएको खुलासा गरेपछि वीरेन्द्रनगर सुर्खेतमा बलात्कारीलाई कारबाही गर्न कानुनमा भएको हदम्याद हटाउन माग गर्दै प्रदर्शन भएको हो ।
ती युवतीले भिडिओमार्फत आफू १६ वर्षको नाबालिग हुँदा ८ वर्षअघि काठमाडौंको एक होटलमा कार्यक्रम आयोजकले बेहोस हुने पेय पदार्थ खुवाएर बलात्कार गरेको सामाजिक संजालमा बताएकी थिइन् ।
सुर्खेतका युवाहरुले स्वतन्त्र रुपमा आयोजना गरेको दबाब मुलक कार्यक्रममा सयौं जना युवाहरु सहभागी भएका थिए । प्रदर्शनमा सहभागीहरुले न्यायको लागि सामाजिक सञ्जालमा अभियान चलाउनु भन्दा सडक मै आएर प्रदर्शन गर्दा उपयुक्त हुने ठानी कार्यक्रम गरेको बताएका छन् । बलात्कार सम्बन्धी मुद्दामा कानुनमा भएको १ वर्ष हदम्याद समेत खारेज गर्नुपर्ने उनिहरुको माग छ । त्यस्तो हदम्यादका कारण बलात्कारीले सजिलै उन्मुक्ति पाउने उनिहरुले बताउछन् । यो प्रदर्शन नेपालभरका बिभिन्न स्थान भैरहेको छ ।
नेपालको मुलुकी अपराध संहिता-२०७४ मा बलात्कार कसुरबारे उजुरीको हदम्याद तोकिएको छ । यौनजन्य हिंसा र दुर्व्यवहारको हकमा अपराध भएको मितिले एक वर्षपछि उजुरी नलाग्ने व्यवस्था छ ।
सुर्खेतमा भएको प्रदर्शनका केहि तस्वीरहरु
