सुर्खेत । रोजगारी दिलाइदिने बहानामा विभिन्न जिल्लाका युवायुवतीलाई प्रलोभनमा पारेर करोडौँ रुपैयाँ ठगी गर्ने गिरोहलाई प्रहरीले सुर्खेतबाट पक्राउ गरेको छ।

सुर्खेतको वीरेन्द्रनगर नगरपालिका वडा नम्बर ३ स्थित स्काई ड्रिम इन्टरप्रेनर्स प्रा.लि. मार्फत ग्लोबल ओरियन्स नेपाल प्रा.लि. सँगको सहकार्यमा बेरोजगार युवाहरुलाई तालीम, राम्रो तलबसहितको रोजगारी दिने भन्दै वार्षिक बीस हजार रुपैयाँ असुली खान बस्न र कोठा उपलब्ध गराई नेटवर्किङ मार्केटिङको जालोमा फसाउने काम भइरहेको थियो।

पिडितहरुलाई नेटवर्क प्रणालीअन्तर्गत नयाँ सदस्यहरू भित्र्याएर प्रति व्यक्ति रु. ५०,००० देखि २ लाख ६० हजारसम्म रकम संकलन गर्ने र सदस्य थप्नेलाई कमिशन दिने लोभ देखाई रकम ठगी गरिएको थियो। यसरी करोडौँ रुपैयाँ संकलन गरी ठगी गरिएको पीडितहरुको जाहेरीको आधारमा जिल्ला प्रहरी कार्यालय सुर्खेतले सम्बन्धित कम्पनीका संचालक तथा कर्मचारीलाई नियन्त्रणमा लिएको हो।

प्रहरीले कम्पनीला संचालक डोटी सायल गा.पा–२ का नरेश बोहोरा, व्यवस्थापक/कर्मचारी, दार्चुला महाकाली गा.पा–४ का कृष्ण धामी, अछाम कमलबजार न.पा–६ का कमल शाही, अछाम कमलबजार न.पा–६ का रबिन्द्र शाही, कर्मचारी कञ्चनपुर महाकाली न.पा–२ का मनिषा सिंह, कञ्चनपुर बेल्डाँडी गा.पा–१ का निर्मला धामी, बैतडी सिगास गा.पा–६ का सुनिता साउद र डोटी बडिकेदार गा.पा–४ का कमला चिमालालाई नियन्त्रणमामा लिएको जिल्ला प्रहरी कार्यालय सुर्खेतका सुचना अधिकार डिएसपी मोहनजंग बुढथापाले जानकारी दिए।

प्रहरीका अनुसार उनीहरू सबै हाल सुर्खेत वीरेन्द्रनगरमै बसोबास गर्दै आएका थिए।

यस गिरोहले देशका विभिन्न स्थानबाट आएका बेरोजगार युवाहरुलाई प्रलोभनमा पारी रकम असुली गरेको खुलेपछि प्रहरीले प्रारम्भिक अनुसन्धानपछि उनीहरूलाई नियन्त्रणमा लिएको हो। घटनासम्बन्धी थप अनुसन्धान जारी रहेको प्रहरीले जनाएको छ।