सुर्खेत । सुर्खेत ट्राफिक प्रहरीले मंगलबार मात्र ट्राफिक नियम उल्लंघन गरी सवारी सञ्चालन गर्ने ८२ वटा अटोमाथि कारबाही गरेको छ। कारबाहीको क्रममा एकैदिन ८० हजार रुपैयाँ राजस्व संकलन गरिएको जिल्ला ट्राफिक प्रहरी कार्यालय सुर्खेतले जनाएको छ।

अटोहरू र तीमार्फत हुने लापरबाहीका कारण सडक दुर्घटना बढ्दै गएपछि ट्राफिक प्रहरीले सडक दुर्घटना न्यूनिकरणका लागि विशेष मिसन सञ्चालन गरेको हो। जसमा मंगलबार ८२ वटा अटोमाथी कार्बाही गरिएको छ। भने ४५ वटा अटोहरुलाई प्रहरीले नियन्त्रणमा लिएको छ।

जिल्ला ट्राफिक प्रहरी कार्यालय सुर्खेतका प्रमुख प्रहरी निरीक्षक वकिल सुनारका अनुसार अटो चालकहरूले सवारी चालक अनुमती पत्र बिना अटो चलाएको, गलत पार्किङ गरेको, लेन विपरित सवारी चलाएको र न्यूनतम मापदण्ड पुरा नगरी सवारी चलाएको लगायतका नियम उल्लंघन गरेको पाइएको छ।

ट्राफिक प्रहरीले ट्राफिक नियमको पालन गरी सवारी चलाउन सबै चालकलाई आग्रह समेत गरेको छ। आगामी दिनमा पनि दुर्घटना न्यूनिकरणका लागि सडक दुर्घटना न्यूनिकरण अभियानलाई निरन्तरता दिने ट्राफिक प्रहरीको भनाई छ।