सुर्खेत । सुर्खेतको वीरेन्द्रनगरमा २२ वर्षीय युवकको आँखामा धारिलो चक्कु प्रहार गरी फरार रहेका एक अभियुक्तलाई प्रहरीले काठमाडौंबाट पक्राउ गरेको छ।
२०८२ साउन ९ गते राति ११:५५ बजेको समयमा वीरेन्द्रनगर नगरपालिका–६ बसपार्कको माथिल्लो गेटमा ललित परियारलाई धारिलो चक्कु प्रहार गरी गम्भीर घाइते बनाइ घटनास्थलबाट फरार भएका जुम्लाको हिमा गाउँपालिका–३ घर भई हाल वीरेन्द्रनगर–९ बसोबास गर्दै आएका नवराज रावतलाई प्रहरीले लामो खोजतलासपछि पक्राउ गरेको हो।
पक्राउ परेका रावतलाई काठमाडौँ उपत्यका अपराध अनुसन्धान कार्यालयको सहयोगमा काठमाडौं महानगरपालिका–१० बुद्धनगरमा लुकीबसिरहेको अवस्थामा साउन २७ गते पक्राउ गरी साउन २८ गते सुर्खेत ल्याइएको जिल्ला प्रहरी कार्यालय सुर्खेतका सुचना अधिकारी डिएसपी मोहनजंग बुढथापाले जानकारी दिए।
हाल पक्राउ परेका अभियुक्तमाथि ज्यान मार्ने उद्योग तथा अंगभंग मुद्दामा आवश्यक थप अनुसन्धान भइरहेको प्रहरीले जनाएको छ।
संवाददाता । बुधबार, साउन २८, २०८२ मा प्रकाशित