वि.सं. २०७९ साल जेठ १५ गते स्थापना भएको कर्णाली मिडियाले आज चार वर्ष सफलतापूर्वक पूरा गरी पाँचौँ वर्षमा प्रवेश गरेको छ। यो केवल एउटा सञ्चार माध्यमको वार्षिकोत्सव मात्र होइन, आम नागरिकको आवाज, पीडा, सम्भावना, संघर्ष र सपनालाई राष्ट्रिय बहसको केन्द्रसम्म पुर्‍याउने अभियानको निरन्तरता पनि हो। यस सुखद अवसरमा सम्पूर्ण दर्शक, पाठक, शुभेच्छुक, विज्ञापनदाता, सहकर्मी पत्रकार, सामाजिक अभियन्ता तथा कर्णाली मिडियासँग प्रत्यक्ष–अप्रत्यक्ष रूपमा जोडिनुभएका सम्पूर्ण महानुभावहरूप्रति हार्दिक आभार व्यक्त गर्दछौँ।

नेपालको संघीय संरचनापछि कर्णाली प्रदेश विकास, पहुँच, पूर्वाधार, शिक्षा, स्वास्थ्य, रोजगारी तथा सूचना प्रवाहका दृष्टिले अझै चुनौतीपूर्ण अवस्थामै रहेको यथार्थ सबैसामु स्पष्ट छ। भौगोलिक विकटता, राज्यको सीमित पहुँच, कमजोर पूर्वाधार र अवसरको असमान वितरणका कारण कर्णालीका धेरै विषय राष्ट्रिय सञ्चार माध्यममा उचित रूपमा स्थान पाउन सकेका थिएनन्। यिनै आवाजलाई मूलधारसम्म पुर्‍याउने उद्देश्यसहित कर्णाली मिडियाको स्थापना गरिएको हो।

स्थापनाकालदेखि नै कर्णाली मिडियाले पत्रकारिताको मूल मर्म—सत्य, तथ्य, निष्पक्षता र जनउत्तरदायित्वलाई आत्मसात गर्दै स्थानीय सरोकारका विषयलाई प्राथमिकतामा राखेको छ। कर्णालीका गाउँ–बस्ती, दुर्गम भूभाग, सीमान्तकृत समुदाय, किसान, युवा, महिला, श्रमिक तथा आवाजविहीन नागरिकका मुद्दालाई राष्ट्रिय बहससम्म पुर्‍याउने प्रयास निरन्तर जारी छ। सञ्चार केवल समाचार प्रवाह गर्ने माध्यम मात्र होइन, समाजलाई सही दिशा दिने दायित्वपूर्ण शक्ति पनि हो भन्ने मान्यताका साथ कर्णाली मिडियाले आफ्नो भूमिका निर्वाह गर्दै आएको छ।

कर्णाली प्रदेशका सामाजिक, राजनीतिक, आर्थिक, सांस्कृतिक तथा विकाससँग सम्बन्धित विविध विषयमा निरन्तर समाचार, विश्लेषण, अन्तर्वार्ता, फिल्ड रिपोर्टिङ तथा बहसमूलक कार्यक्रमहरू सञ्चालन गर्दै कर्णाली मिडियाले फरक पहिचान निर्माण गरेको छ। “कर्णाली विशेष”, “जनप्रतिनिधीसँग कर्णाली मिडिया”, “कर्णाली संवाद”, “फिल्ड रिपोर्टिङ”, “युवाहरूसँग कर्णाली मिडिया”, “कर्णाली सभ्यता”, “प्रविधि” तथा “खेलकुद” जस्ता कार्यक्रममार्फत स्थानीय विषयलाई गहिरो रूपमा उठाउने प्रयास गरिएको छ। यी कार्यक्रमहरूले जनचासोका विषयलाई उजागर गर्नुका साथै जनप्रतिनिधि, नीति निर्माता र सरोकारवालालाई उत्तरदायी बनाउन समेत महत्वपूर्ण भूमिका खेलेका छन्।

पछिल्ला चार वर्षमा कर्णाली मिडियाले केवल समाचार सम्प्रेषण गर्ने काम मात्र गरेको छैन, समाजमा चेतना अभिवृद्धि, सुशासन प्रवर्द्धन, विकासमुखी सोच निर्माण तथा सामाजिक उत्तरदायित्व बहन गर्ने दिशामा पनि सक्रिय भूमिका खेलेको छ। शिक्षा, स्वास्थ्य, सडक, विद्युत्, खानेपानी, रोजगार, कृषि, पर्यटन, जडिबुटी, वातावरण संरक्षण, महिला सशक्तीकरण, युवा सहभागिता तथा स्थानीय सभ्यता–संस्कृतिसँग सम्बन्धित विषयलाई प्राथमिकताका साथ उठाउँदै आएको छ। विशेषगरी दुर्गम जिल्लाबाट आउने जनताका आवाजलाई प्राथमिकतामा राख्नु कर्णाली मिडियाको महत्वपूर्ण विशेषता बनेको छ।

कर्णालीको सभ्यता, इतिहास र पहिचानलाई संरक्षण र प्रवर्द्धन गर्नु आजको आवश्यकता हो। आधुनिकतासँगै स्थानीय भाषा, कला, संस्कृति र परम्परागत जीवनशैली हराउँदै जाने चिन्ताबीच कर्णाली मिडियाले स्थानीय संस्कृतिको दस्तावेजीकरण र प्रचार–प्रसारमा निरन्तर योगदान पुर्‍याउँदै आएको छ। सिँजा सभ्यता, खस संस्कृति, परम्परागत चाडपर्व, लोककला, मौलिक परम्परा र स्थानीय जीवनशैलीलाई सञ्चार माध्यममार्फत नयाँ पुस्तासम्म पुर्‍याउने प्रयास पनि निरन्तर जारी छ।

डिजिटल युगमा पत्रकारिता थप चुनौतीपूर्ण बन्दै गएको छ। सामाजिक सञ्जालमा फैलिने अपुष्ट सूचना, भ्रमपूर्ण प्रचार, दुष्प्रचार तथा गैरजिम्मेवार सामग्रीको भीडबीच विश्वसनीय पत्रकारितालाई जोगाइराख्नु आजको प्रमुख चुनौती हो। यस्तो अवस्थामा तथ्यमा आधारित, प्रमाणित र जिम्मेवार पत्रकारिताप्रति कर्णाली मिडियाको प्रतिबद्धता अझ दृढ बनेको छ। समाचारको विश्वसनीयता र जनविश्वास नै सञ्चार माध्यमको सबैभन्दा ठूलो शक्ति हो भन्ने मान्यताका साथ हामीले जिम्मेवार पत्रकारितालाई निरन्तर प्राथमिकतामा राखेका छौँ।

यस यात्रामा कर्णाली मिडियाले विभिन्न चुनौतीहरू पनि सामना गरेको छ। सीमित स्रोत–साधन, आर्थिक चुनौती, दुर्गम क्षेत्रमा सूचना संकलनको कठिनाइ, प्राविधिक अभाव तथा प्रतिस्पर्धात्मक सञ्चार वातावरणका बाबजुद पनि हामी निरन्तर अघि बढिरहेका छौँ। यसमा दर्शक, पाठक, शुभेच्छुक, विज्ञापनदाता, सहयोगी संस्था तथा सम्पूर्ण सहकर्मीहरूको विश्वास, साथ र हौसलाले ठूलो ऊर्जा प्रदान गरेको छ।

पाँचौँ वर्षमा प्रवेशसँगै हामी नयाँ ऊर्जा, नयाँ सोच र थप जिम्मेवारीका साथ अघि बढिरहेका छौँ। कर्णालीका जनताको भरोसा र अपेक्षालाई केन्द्रमा राख्दै स्थानीयदेखि राष्ट्रिय स्तरसम्म जनताका आवाजलाई निरन्तर उजागर गर्ने हाम्रो प्रतिबद्धता अझ बलियो बनेको छ। भविष्यमा पनि सत्य र जनहितको पक्षमा उभिँदै कर्णालीको समृद्धि, विकास र पहिचानको यात्रामा सहयात्री बन्ने हाम्रो प्रयास निरन्तर जारी रहनेछ।

कर्णालीको आवाज देशभरि पुर्‍याउने हाम्रो अभियानमा साथ दिनुहुने सम्पूर्णमा पुनः हार्दिक धन्यवाद।