काठमाडौँ। आईसीसी टी–२० विश्वकप खेल्न अमेरिका पुगेको नेपालले सोमबार क्यानडासँग वामअर्प म्याच खेल्ने भएको छ।
अन्तर्राष्ट्रिय क्रिकेट परिषद् (आईसीसी)ले सार्वजनिक गरेको आधिकारिक तालिका अनुसार नेपालले एसोसिएट राष्ट्रहरू अमेरिका र क्यानडासँग वामअर्प म्याच खेल्ने तय छ। सोही तालिका अनुसार नेपालले पहिलो वामअर्प म्याच क्यानडासँग खेल्न लागेको हो।
ग्रान्ड प्रेरी क्रिकेट रंगशाला, टेक्सासमा हुने यो खेल नेपाली समयअनुसार राति ९:१५ बजेबाट शुरू हुने छ। आईसीसीले वामअर्प म्याचका लागि २७ मेदेखि १ जुनसम्मको तालिका सार्वजनिक गरेको छ। बुधबार सोही रंगशालामा नेपालले अमेरिकासँग वामअर्प म्याच खेल्ने छ।
आईसीसीका अनुसार विश्वकपअघि टेक्सासको ग्रान्ड प्रेरी क्रिकेट स्टेडियम, फ्लोरिडाको ब्रोवार्ड काउन्टी स्टेडियम, क्विन्स पार्क ओभल र ट्रिनिडाड एन्डा टोबागोको ब्रायन लारा क्रिकेट एकेडेमीमा १६ वटा अभ्यास खेल हुनेछन्।
दक्षिण अफ्रिकासहित कुल १७ टिमले वामअर्प म्याच खेल्नेछन्। यी वामअर्प म्याच २०/२० ओभरको हुने छ। तर, अन्तर्राष्ट्रिय टी–२० मान्यता प्राप्त हुनेछैन। त्यसैले आफ्नो १५ सदस्यीय टोलीका सबै सदस्यहरूलाई मैदानमा उतार्न पाइने छ।
