३२ असार, दैलेख । दुल्लु नगरपालिकाले आज आर्थिक बर्ष २०७८/०७९ को बजेट तथा कार्यक्रम माथी सार्वजनिक सुनुवाइ गरेको छ ।
दुल्लु नगरपालिका र यसका विषयगत शाखाबाट भएका काम कारबाहीहरु कत्तिको प्रभावकारी भए? यसबाट नागरिकले पाउने सेवा सुविधाको गुणस्तर कस्तो छ? लगाएतका विषयमा सार्वजनिक सुनुवाइमा छलफल भएको हो ।
दुल्लु नगरबासिले पालिकाबाट प्रवाह हुने सेवाका बारेमा विभिन्न प्रश्नहरु राखेका थिए । स्थानीयले कामहरुमा हुने ढिलासुस्ती, कामको गुणस्तर, कर्मचारीको स्वभाव, नगरपालिकाका दीर्घकालीन योजनाहरु, बसपार्क कहिले बन्छ ? नगरभर विध्युतीकरण कहिले हुन्छ ? नगरपालिकाको फोहोरमैला व्यवस्थापन जस्ता विषयमा प्रश्न उठाएका थिए । नगरपालिकामा भएका केही कामहरुमा दिगोपना दिन नसकेको र स्टिमेट अनुसार काम नभएको जस्ता गुनासोहरु पनि गरेका छन् ।
स्थानीयको गुनासोलाई सम्बोधन गर्न दुल्लु नगरपालिकाका नगरप्रमुख, उपप्रमुख, प्रत्येक वडाका वडाअध्यक्ष, विषयगत शाखाका कर्मचारी लगायत जवाफदेही वक्ता रहेका थिए ।
दुल्लु नगरपालिकाका विकास निर्माण र दुल्लु समृद्धिका विकासमा नियमित अनुगमन गर्ने, तत्कालीन दुल्लुका समस्याहरू विद्युत, सडक, खानेपानी, शिक्षा, स्वास्थ, रोजगारी लगायतका क्षेत्रमा आएका गुनासोहरुलाई समाधान गर्ने जवाफदेहीहरुले प्रतिबद्धता जाहेरी गरेका छन् ।
गुनासोका आधारमा ७ वटा प्रतिबद्धता गरेको दुल्लु नगरपालिकाका नगरप्रमुख भरत रिजालले बताएका छन् । यस्तै, सुनुवाइमा उठेका गुनासो तथा समस्याहरुलाई आजैबाट सुधार गर्दै लैजाने तथा बिकास निर्माणका काम पनि गुणस्तरीय बनाउने उनको भनाई छ ।
सार्वजनिक सुनुवाइमा भने पुराना जनप्रतिनिधिको उपस्थिति देखिएको थिएन ।
संवाददाता । शनिबार, असार ३२, २०७९ मा प्रकाशित