इजरायलको द्वन्द्वग्रस्त क्षेत्र सेदोद नेभेगको किबुज अलुमिनमा हमासको आक्रमणमा परी मृत्यु भएका १० नेपाली विद्यार्थीको शव पठाउन केही दिन लाग्ने भएको छ ।

इजरायल आफैं युद्धरत रहेकाले शव व्यवस्थापनमा चुनौती सामना गरिरहेको छ । यद्यपि नेपाली विद्यार्थीहरुको शवलाई भने इजरायल सरकारले आफ्नै खर्चमा पठाउने भएको छ ।

असोज २० मा किबुज अलुमिन प्रवेश गरी हमासले अन्धाधुन्ध गोली गोली र ग्रिनेड प्रहार गर्दा १० नेपाली विद्यार्थी मारिएका थिए । चारजना घाइते भए भने एकजनाको अवस्था अज्ञात छ ।

इजरायलमा ठूलो संख्यामा हताहती भएकाले शव पहिचान र व्यवस्थापन चुनौती छ । इजरायली अधिकारीका अनुसार शवलाई प्लास्टिकमा सिलबन्दी गरी ट्रकको फ्रिजमा राखिएको छ । १३ सय शवको पहिचान भइसकेको छैन, जसमा विदेशी नागरिक पनि रहेको स्थानीय सञ्चारमाध्यमले जनाएका छन् । सबै नागरिकको पहिचान गर्न समय लाग्ने भएकाले शव पठाउन ढिलाइ हुने भएको हो । इजरायलमा विदेशीसहित सबैको फ्रिङ्गरप्रिन्ट राखिन्छ ।

इजरायलका लागि नेपाली राजदूत कान्ता रिजालले नेपाली मारिएको खबर पाएलगत्तै उचित ढंगले शव व्यवस्थापन गर्न इजरायली पक्षसँग समन्वय गरिएको जनाएकी छन् । उनले शवलाई क्षेत्रगत हिसाबले अलग(अलग रुपमा छुट्याएर राखिएको जानकारी दिइन् ।

यसैबीच इजरायलमा पहिलो नेपाली मिडियाका रुपमा कान्तिपुर टिमका तीनजना सहकर्मी रिपोर्टिङका लागि पुगेका छन् । कान्तिपुर टेलिभिजनका श्याम श्रेष्ठ, कान्तिपुर दैनिकका होम कार्की र प्रकाशचन्द्र तिमिल्सेना इजरायलमा भइरहेको युद्धको रिपोर्टिङका लागि पुगेका हुन् ।